إيه اللي بيخلّي الطيّارة تطير؟
0 ساعة
30 دقيقة
13-16
6-12
مكان مفتوح أو أوضة طولها ٥ متر على الأقل
2022/04/21
| الوصف | الوقت | ملاحظات | ||
|---|---|---|---|---|
| سؤال | إسألوا المشاركين السؤال دا: "هوّ إيه اللي بيخلّي الطيّارة تطير؟" أوّل هدف من السؤال دا هو إن المشاركين يبصّوا للطيّارة ويحاولوا يعرفوا دور كل جزء فيها. الهدف التاني هو إنّنا ندوّن النظريات -بما فيها اللي علميّاً غلط- علشان نستعملها كأمثلة في الأجزاء التالية من الورشة. حاجة مهمّة: ضروري كلّ الإجابات تتكتب بلا استثناء على ورقة كبيرة وتتعلّق على الحيطة في مكان واضح. | 15 | ورق كبير او سبّورة | |
| تحليل | - عدّوا على إجابة إجابة واسألوا السؤال دا: "هل لو الحاجة دي مش موجودة، الطيّارة مش هتطير؟ طيّب ليه؟" أوّل هدف من السؤال دا هو إن المشاركين يتشجّعوا يقولوا اللي هم شايفينه من غير خوف من الغلط والهدف التاني هو بدء الكلام عن علاقة الفيزيا بأجزاء الطيّارة زي علاقة سرعة الحركة بسرعة الهوا والعلاقة بين الجاذبيّة والوزن. حاجة مهمّة: خدوا وقتكم في النشاط دا وناقشوا كل الأفكار بشكل جادّ بس من غير ما تغرزوا جامد في الكلام العلمي. أحسن تتكلّموا بشكل غير مباشر والكلام يكون بأمثلة أكتر. | 30 | ورق كبير او سبّورة | |
| مقدّمة | أوّلاً، لحدّ دلوقت ما فيش تفسير كامل بيشرح ليه بالضبط الطيّارة بتطير. فكلامنا ليه أهمّيّته طالما إحنا بنحاول نفكّر ونتناقش بشكل علمي (سؤال مفيد: ممكن حد يقول يعني إيه "نفكّر بشكل علمي؟"). مقالة مفيدة بالإنجليزي: https://www.scientificamerican.com/article/no-one-can-explain-why-planes-stay-in-the-air/ ثانياً، في نظريّتين علميّتين مهمّين (سؤال مفيد: ممكن حد يقول يعني إيه نظريّة؟) ضروري نبقى فاهمينهم وإحنا بنتكلّم في الموضوع دا. | 15 | ورق كبير او سبّورة | |
| شرح أوّل نظريّة | أوّل نظريّة هي نظريّة برنولي. دي ببساطة بتقول إن "ضغط أي مائع (سائل أو غاز) بيقلّ كل ماتزيد سرعته ، والعكس صحيح." اللي بيستخدموا نظريّة برنولي علشان يفسّروا ليه الطيّارة بتطيّر شايفين إن علشان جناح الطيّارة بيكون مقوّس من فوق ومسطّح من تحت، الهوا اللي بيمشي فوقه بيتحرك أسرع من الهوا اللي بيمشي تحته (علشان مشواره أطول)، وبالتالي بيبقى الضغط فوق الجناح أقل من الضغط تحت الجناح فيروح الجناح مشفوط لفوق ورافع معاه الطيّارة. طبعاً إحنا طبيعي نحسّ إن قوّة الشفط دي مش معقول تكون كفاية إنّها ترفع طيّارة بحالها بس خلّينا فاكرين برضو إن جناح الطيّارة كبير جدّاً وسرعتها كمان كبيرة جداً جداً. بسّ المشكلة في التفسير دا هو إنّه لو صحيح، ما كانتش الطيّارات قدرت تطير مقلوبة زيّ ما بتعمل في العروض. | 10 | ورق كبير او سبّورة | |
| أمثلة | "لمّا عربيّة ماشية بسرعة بتعدّي جنبكم، بتحسّوا إنّكم بتتشَدّوا ناحيتها؟" تجارب مشهورة: الكبّياة الورق على سقف عربيّة. البيضة المسلوقة ورقبة البرطمان. | 20 | كام بيضة مسلوقة. برطمان بقّه أصغر سنّة من البيضة المتقشّرة. -ورق وكبريت. | |
| شرح تاني نظريّة | تاني نظريّة هي واحدة من قوانين نيوتن للحركة، تحديداً قانون نيوتن التالت للحركة. القانون دا بيقول إن "لكل فعل ردّ فعل بنفس قوّته بس في عكس إتّجاهه". اللي بيستخدموا القانون دا علشان يفسّروا ليه الطيّارة بتطيّر شايفين إن علشان جناح الطيّارة بيكون مايل لفوق من قدّام، الهوا اللي بيخبط فيه من تحت بيزقّه لفوق وبيزروح زاقق الطيّارة كلّها معاه لفوق. قانون نيوتن التالت يعتبر تفسير أوقع من نظرية برنولي بس برضو ما بيفسّرش ليه الضغط بيكون قليّل فوق الجناح. | 10 | ورق كبير او سبّورة | |
| أمثلة | أسئلة مفيدة: "لمّا بتطلّع إيدك من شبّاك المواصلات، يفرق لو إيدك مايلة لفوق أو لتحت؟" تجارب مشهورة: صاروخ ورق واتني أطرافه اللي ورا لتحت. | 20 | ورق علشان نعمل صواريخ | |
| لعب وتقفيل | أفكار لنهاية الورشة: - مين يعمل أحسن صاروخ ورق؟ طيب يعني إيه أحسن وهنحكم إزّاي؟ - تعالوا نرسم بيوت ممكن تطير. | 30 | ورق وألوان | |
التعليقات
المزيد