حكاية بطل وكفاح شعب
د آلاء عبد العزيز
تعالوا نركب آلة الزمن ونرجع 3500 سنه قبل الميلاد علشان نعرف حكاية بطل اسمه الملك أحمس الأول :
فى يوم من الايام دخل مصر غزاه محتلين اسمهم الهكسوس وكلمة هكسوس معناها حكام البلاد الأجنبية أصلهم كانوا من أصول مختلفة جاين من غرب اسيا طب دخلوا مصر ازاى الأجانب دول ؟ مؤرخين قالوا أصلهم كانوا متفوقين عسكريا على المصرين علشان كا عندهم ادوات حربية حديثة ذى العجلات الحربية و مؤرخين تانين قالوا انهم دخلوا الأول بشكل تدريجى وسلمى على اساس انهم تجار مهاجرين وبعد كده كانت الكارثة بدأو يبقى ليهم نفوذ كبير وقدروا انهم يسيطروا على جزء كبير من شمال مصر وأخذوا من مدينة اسمها أواريس عاصمة ليهم فى شمال الدلتا المكان ده دلوقتى على فكره اسمه صان الحجر قريب من مدينة الزقازيق وطبعا احتلال الهكسوس لشمال مصر كانت صدمه كبيره على المصرين خصوصا ان الهكسوس ما اضافوش حاجه للتاريخ المصرى غير الظلم والسلب والقهر وبكده مصر اتقسمت الى جزئين مصر العليا فى الجنوب وعاصمتها طيبه ومصر السفلى فى الشمال وعاصمتها أواريس وفضل الوضع على ماهو عليه لحد ما فى يوم جاءت رساله من ملك الهكسوس فى الشمال الى الملك المصرى سقنن رع فى الجنوب مكتوب فيها :
” أن أصوات أفراس النهر فى بحيرة طيبه بتزعج اذن ملك الهكسوس ولو ما سكتتش حاجى ابدها بنفسى “
طبعا الرساله دى نزلت على الملك سقنن رع بمثابة اعلان للحرب وفعلا سقنن رع جهز جيش وخرج بيه علشان يقابل ملك الهكسوس لكن للاسف اتهزم الملك المصرى واتقتل فى ارض المعركه.
وكان لسقنن رع ولدين كامس الكبير واحمس الصغير وتولى العرش طبعا بعديه ابنه كامس الكبير وال كمل مسيرة ولده فى طرد الهكسوس الا انه سقط كمان فى أرض المعركه وتولى العرش بعد كامس اخوه احمس الصغير ال كان يدوبك عنده 10 سنين لكن بفضل مامته الملكه ايا حتب الست المصريه الأصيله ال فضلة وراه لحد معلمته فنون القتال والحكمه علشان يبقى بطل من أبطال مصر وبدأ أحمس فعلا يطور فى الجيش ويدخل الاسلحه الحديثة والعجلات الجربية ال كان بيستخدمها الهكسوس استعدادا لحربهم والأهم من كل ده ان الشعب المصرى كله كان مع الملك احمس وشاف فيه القائد ال حيخلصهم من المرار الطافح بتاع الهكسوس وقاد أحمس الجيش هو و والدته الملكه اياح حتب لحد ما حصرهم وقتل الملك بتاعهم علشان افراس النهر ما تبقاش تزعجه تانى
وفضل أحمس يكم مصر لمدة ربع قرن كلها كانت انجازات ومشاريع ضخمه كانت حجر الأساس لعصر دولة حديثة
ومات احمس فى ربيع حياته ما بين سن 40 أو الخمسين والمومياء بتاعته بتقولنا اد ايه أنه كان رجل عظيم الجسم قوى البنية.