الحطاب و الغول استنسخ

الحطاب و الغول

إعداد: زينب كمال

التاريخ 10 يوليو 2019

الحكاية الشعبية الاصلية

كان يا مكان كان في راجل حطاب و عنده بنت اسمها فاطمة فا خرجت تلم الحطب فا و هي ماشية شافت حجر شالت الحجر لاقت سلم نزلت السلم اتاريه بيت غول و الغول ده قام متجوزها و قفل الحجر ابوها قلب عليها البلد ماهوش ايه لاقيها اتصل بزمايلها  فين فاطمة مانعرفش فين فاطمة مانعرفش راح للبنت زميلتها فين فاطمة قالت له هي كانت بتلم معانا الحطب بس محدش لاقيها قعدوا يفتشوا لاقوا الحجر شالوا الحجر نزلوا لاقوا بيت ايه الغول قامت فاطمة شافت ابوها قالت له اطلع يابا لحسن جوزي يجي يكلك انت و رجاله اللي معاك قال لها ياكلي ازاي قالت له هو الغول يابا انت مش هاتقدر عليه قام الراجل قام قال لها طيب انا هاجي اخلصك منه بس ادعيلي يا فاطمة قالت له روح يا بابا ربنا يجعلك تخلصني منه فا قام ايه الغول طلع عليه قال له ايه عاوز ايه قال له عاوز فاطمة بنتي قال له لا خد حاجة غير فاطمة بنتك و سيبلي فاطمة قام قال له طب اديني رحاية العيش بتاعتك قام مديله رحاية العيش 

رحاية العيش دي يلفها كده بقا ياكل هو و اخوات فاطمة 

اجي شيخ البلد شافها اتغاظ ضرب الراجل و خد منه ايه الرحاية

راح الراجل للغول و قال له الرحاية راحت مني

قال له طب عايز ايه قال له عايز الحمارة

قام مديله الحمارة بتاعته و الحمارة دي كل ما يضربها بالعصاية تنزل له جنيه دهب 

يضربها بالعصاية و يصرف هو و فاطمة و اخواتها

واحد حرامي شافه راح ضاربه و واخد منه الحمارة

قام الراجل راح للغول قال له الراجل اخد مني الحمارة قال له عاوز ايه قال له هات لي بقا القارعة بتاعتك 

القارعة بتاعته حجر يضربها فالارض تطلع اتنين عبيد سود بالكرابيج السوداني يضربوا اي حد قام مديبه القارعة 

راح لشيخ البلد قال له هات الرحاية بتاعتي قال له لا قام ضارب القارعة قاموا العباد السود طالعين ضاربينه قام مديله الرحاية 

راح للراجل التاني قال له هات الحمارة بتاعتي قال له لا قام ضارب القارعة قاموا العباد السود طالعين ضاربينه قام مديله الحمارة

راح للغول قال له هات فاطمة قام قال له لا فاطمة لا قام ضارب القارعة قاموا طالعين الايه العباد السود ضاربينه قام مديله فاطمة 

و توتة توتة خلصت الحدوتة

الحكاية بعد التغيرات

كان يا مكان كان في راجل حطاب و بنته الكبيرة اسمها فاطمة

جه يوم فاطمة راحت تساعد ابوها في لم الحطب و و هي ماشية شافت حجرة كبيرة مدورة شكلها جميل شالت الحجرة لاقت سلم نزلت السلم اتاريه بيت غول و الغول ده اول ما شافها قال لها تتجوزيني و هي خافت منه و رفضت راح الغول حبسها معاه تحت الارض قال لها هاتفضلي معايا لغاية ما توافقي تتجوزيني و قفل الحجرة

جه ابوها لاقاها غابت قلق عليها و قلب عليها البلد ماهوش لاقيها اتصل بصحابها و زمايلها فين فاطمة مانعرفش فين فاطمة مانعرفش راح للست العرافة سالها بنتي الكبيرة فين قالت له تحت حجرة في قلب الارض الراجل افتكر الحجرة المدورة اللي عدوا عليها و كان لسه هايمشي يجيب بنته العرافة حذرته بان في غول عايش هناك و نصحته انه يقعد تلات ليالي يطلب من الغول حاجات قبل ما يطلب منه بنته

 راح ااراجل عند الحجرة اياها و شالها و نزل تحت لقى بيت الغول 

و الغول ده كانت الناس بتحكي عليه انه ضخم و مخيف و كل حاجة في بيته مسحورة

فاطمة لما ابوها نزل شافته راحت خافت عليه و قالت له اطلع يابا لحسن الغول يجي يكلك هو الغول يابا انت مش هاتقدر عليه قام ابوها قال ماتخافيش يا فاطمة انا هخلصك منه بس انتي اي كلام هقوله ماتستغربيش منه فا قام ايه الغول طلع عليه قال له عاوز ايه قال له عاوز فاطمة بنتي قال له لا خد حاجة غير فاطمة بنتك و سيبلي فاطمة اتجوزها قام قال له طب اديني رحاية العيش بتاعتك يمكن لما تشوفك بتساعد ابوها ترضى عليك و تتجوزها قام مديله رحاية العيش 

رحاية العيش دي سحرية بقا فا اللي يلفها كده ياكل منها اي حاجة هو عايزها

الراجل خد الرحاية و روح بيته و اكل اطفاله كلهم اخوات فاطمة

اجى واحد بلطجي شافها اتغاظ ضرب الراجل و خد منه ايه الرحاية

راح الراجل تاني يوم للغول و قال له الرحاية راحت مني

قال له طب عايز ايه قال له عايز الحمارة بتاعتك

قام مديله الحمارة بتاعته و الحمارة دي كل ما حد يحط لها اكل تاكل تقوم تنزل له جنيه دهب

و اولاد الراجل دول كانوا طيبين حطوا اكل كتير للحمار اول ما وصل فا الحمار نزلهم دهب كتير

جه واحد حرامي شاف اللي الحمارة بتعمله راح اتسحب بالليل و سرق الحمارة 

قام الراجل في اليوم التالت بعد تفكير كتير راح للغول قال له الحرامي سرق مني الحمارة قال له عاوز ايه قال له هات لي بقا الشومة بتاعتك 

الشومة بتاعته دي حجر يضربها فالارض تطل مارد يضرب اي حد قام مديله الشومة 

راح للبلطجي قال له هات الرحاية بتاعتي قال له لا قام ضارب الشومة عالارض قام المارد طالع ضاربه قام مديله الرحاية 

راح للحرامي قال له هات الحمارة بتاعتي قال له لا قام ضارب الشومة قام المارد طالع ضاربه قام مديله الحمارة

راح رابع يوم للغول قال له هات بنتي قام قال له لا فاطمة لا قام ضارب الشومة قام طالع المارد ضاربه قام مديله فاطمة 

و توتة توتة خلصت الحدوتة