الست الصغننة
إعداد: زينب كمال
عنوان الحكاية – العجوز و الحرامي – مرة زغننة – الست الصغننة
من كتاب القصص الشعبي في الدقهلية للباحث فتوح أحمد فرج
الحكاية الشعبية الاصلية
صلي ع النبي
كان فيه مرة زغننة زغننة و خزانتها زغننة زغننة و نحاسنها زغنن زغنن … و كل حاجتها زغننة زغننة.كل ما تيجي تكنس البيت، تلاقي جنيه، تاخد الجنيه و تحطه في الطاقة. ييجي الحرامي، يسرقه، يوم ورا يوم فكرت تعمل ايه؟ قامت شخت في الطاقة و دقت في الحيطة مسامير، و حطت ع السطح ديك، و ورا الباب حمار.
فجه الحرامي، مد ايده، ياخد الجنيه إيده انعاصت، جه يمسحها في الحيطة، المسامير عورته رفع وشه لفوق، قام الديك شاخخ في بقه، و جه يطلع قام الحمار رفسه.
و توتة توتة فرغت الحدوتة.
| الشخصيات | الست الصغننة و الحرامي |
| الزمان و المكان | في بيت الست |
| دلالة تاريخية | لا توجد |
الحكاية بعد التغيرات
كان يا مكان كان فيه ست زغننة زغننة و بيتها زغنن زغنن و عفشها زغنن زغنن و كل حاجتها زغننة زغننة.
كل ما تيجي تكنس البيت، تلاقي جنيه، تاخد الجنيه و تحطه في حصالتها الزغننة. ييجي الحرامي، يسرقه، يوم ورا يوم فكرت تعمل ايه؟؟ قامت حطت مشبك و دهان احمر في الحصالة. و دقت في الحيطة مسامير، و ورا الباب حمارها الزغنن. فجه الحرامي مد ايده ياخد الجنيه صوابعه شبكت فالمشبك و انعاصت احمر فا طلع ايده بسرعة و بص عليها لاقى احمر افتكره دم، جه يمسح ايده في الحيطة، المسامير عورته و جه يطلع قام الحمار رفسه.
و توتة توتة فرغت الحدوتة
| الشخصيات | الست الزغنتتة و الحرامي |
| الزمان و المكان | في بيت الست |
| دلالة تاريخية | لا يوجد |
الدروس المستفادة
ممكن حد يبقى زغنتت بس بذكائه يقدر يدافع عن نفسه